Isumat.com/Marso 22, 2022
Nag-antos na liwat hin bunal an kumunista nga hugpo ha Eastern Visayas han makuha han mga tropa han gobyerno an mga armas ngan iba pa nga mga gamit ha magkalainlain nga operasyon ha Eastern Samar ngan Southern Leyte hadin nag-agi nga pira ka adlaw.
Hadton Marso 17, 2022, nagka-asdangay an kapulisan ngan rebelde nga mga terorista ha Brgy Cagmanaba, Jipapad, Eastern Samar kun diin narekupo han mga tinubyanan han balaud in usa nga shotgun, lima ka rounds hin mga bala hin 5.56 rifle, duha nga cellphones ngan duha nga solar panels.
An nasabi nga armas ngan mga ekipahes in ginbayaan han mga rebelde han umiskapo hira katapos han 10-minutos nga pakigpusilay kontra han tropa han mobile force battalion ha panguna ni Lt Junriel Rosario.
Waray nahisumat nga nagkasasamaran o namatay han magkaluyo nga panig katapos han engkwentro.
Ha luyo nga bahin, natad-an han militar in pira nga armas ngan mga bala nga gintago han NPA ha Brgy Old Kauswagan, St Bernard, Southern Leyte.
Ini in ginlalakipan hin usa nga AK47 Rifle, duha nga magazines hin 653 rifle, duha nga kalibre 45 nga pistola,, tulo ka magazines hin M16 ngan kadam-an nga bala.
Didto naman ha Brgy Calag-itan, Hinunangan, Southern Leyte, nakuha han militar in usa nga M16 rifle ngan duha ka magazines para han nasabi nga pusil.
Dida han report han Philippine Army, an mga lugar kun diin namumutang an mga armas an iginsumat han mag-asawa nga rebelde nga sumurender ha gobyerno hadin Enero.
Hira alyas Roc ngan alyas John an nagtutdo ha militar kun diin namumutang an nasabi nga mga armas ngan gamit han ira anay mga kaupdanan ha kagi-usan kumunismo.
Iginpahayag naman ni 14th Infantry Battalion Commander LtCol Ernesto Dela Rosa Jr nga an nasabi nga pakakuha hin mga armas tikang han kaaway han gobyerno in nagpapakita nga waray na nagsusuporta han ira kagi-usan.
Antis an nasabi nga operasyon, iginsaysay nira Roc ngan John nga iginlubong nala an mao nga mga armas kay waray na suplay hin bala nga naabot ha ira para han nasabi nga mga pusil. #
