Isumat.com/Disyembre 9, 2021
Naawat an kinabuhi hin usa nga kaapi han media han pusilon hin waray hikilal-i nga suspetsado ha sulod han iya balay ha Brgy San Joaquin, Calbayog City, alas 6:30 han gab-i kakulop, Disyembre 8, 2021.
An biktima in ginkilala nga hi Jesus Malabanan, 58 anyos ngan inasaw-an. Hiya in journalist nga nakabase ha Pampanga pero an iya pamilya in nag-uukoy ha Calbayog.
Subay han pahayag han iya misis nga hi Mila, hadto nga takna, hi Malabanan in nagkikita hin telebisyon han tigda la hiya makabati hin buto hin pusil. Han manginano hi Mila, iya nala nakit-an nga nahuyatang na an biktima ngan mayda igo hin bala ha ulo.
Kadagmitan gindara hi Malabanan ngadto hin usa nga hospital pero patay na hiya han umabot ngadto.
An gintatahapan in dayon naman umiskapo katapos han krimen.
Hi Malabanan in pira pala ka adlaw ha Calbayog. Sumala han iya mga kaupod ha trabaho ha Pampanga, nagbakasyon an biktima basi igka-urusa han iya pamilya ngan mga paryente.
Hi Malabanan in correspondent han Manila Standard, Bandera ngan Reuters. Nagsumat in katatapuran nga surok nga may nakakarawat nga panhulga ha iya kinabuhi an biktima, ngan ini nga anggulo in usa nga ginkikita han mga imbestigador kun may kalabutan ha iya trabaho.
An biktima in damo an artikulo nga ginsurat mahitungod han madugo nga drug war nga natatabo ha Pilipinas ngan nakakarawat na hin mga pasidungog tungod han iya trabaho.
Ini nga panhitabo in mahugot nga ginkondenar han mga kaapi han media sugad man han Philippine National Police. #
