Isumat.com/Hunyo 11, 2021
Tungod han padayon ngan nakaka-alarma nga paghinitaas han mga kaso han Covid-19, nagdesisyon an LGU-Borongan City ha Eastern Samar nga igpailarum ha Modified Enhanced Community Quarantine an nasabi nga syudad.
Dida han Executive Order nga iginpagawas ni City Mayor Jose Ivan Agda, tinikangan hiton Hunyo 13 tobtob Hunyo 26, igpapasunod an MECQ ha iya nasasakupan nga lugar.
Lakip han kamanduan amo an paglimitar han gi-os han katawhan kun diin an importante la nga mga pagbiyahe an tutugutan tipasulod ngan tipagawas han Borongan City. An mga mulopyo nga mayda importante nga toyo ha gawas han balay sugad han pagpakabuhi, trabaho, emergency ngan pagdeliver hin essential nga produkto ngan serbisyo amo la an tutugutan.
An mga menor de edad ngan lapos hin 65 anyos an pangidaron sugad man an may mga sakit in deri puede magsinudoysudoy gawas han balay.
An mga importante nga katitirok sugad han relihiyoso nga aktibidadis in tobtob la ha 25 porsyento an kapasidad han venue. Igindederi gihapon an burublang ngan pag-irignom ha pampubliko nga mga lugar.
Samtang, temporaryo nga suspendido an mga operasyon han beach ngan iba pa nga klase hin resorts ha Tacloban. Epektibo ini tinikangan Hunyo 12 tobtob nga waray abiso han City Government kun san-o utro aabrihan ini nga mga establisemento.
An nakagduso hini nga pitad han syudad amo an kabaraka nga magkatitirok an katawhan ha mga beaches ngan resorts dida hiton Domingo, Hunyo 13, tungod kay nag-eskudyul hin power interruption nga 12-oras an National Grid Corporation of the Philippines ha coverage han LEYECO II nga amo an Tacloban, Palo ngan Babatngon.
Antis hini, naghangyo an City Government ha NGCP nga ig-ugsod la anay an pagparong han koryente, pero nagsering an NGCP nga deri na puede kay kinahanglan trabahoon na an panliwan han mga facilidadis han elektrisidad nga kadaan na.
Dara hini, nagmando an LGU-Tacloban nga sarado la anay an mga beaches nga nasasakupan han syudad. Waray pa klaro nga petsa kun san-o aabrihan utro ini nga mga establisemento kay madepender ini han sitwasyon han kadamo han nagkakatatapnan han Covid-19.
Yana nga adlaw, Hunyo 11, aada ha sobra 1,200 an Active Cases ha bug-os nga rehiyon. Dida han Huebes, sobra 500 an bag-o nga kaso ngan yana nga adlaw 412 an bag-o nga pasyente han kagaw han Eastern Visayas.
An DOH Regional Office in nagsering kakulop nga basar han pahayag han mga contact tracers, nagawas nga kadam-an han mga nagkakatatapnan in didto ha mga social gatherings ngan mga parties. #
