Isumat.com/Oktubre 1, 2021
Dako an pagpasalamat ni Almeria, Biliran Mayor Richard Jaguros nga nabakunahan na hiya sanglit deri grabe an kahimtang han iya panlawas han magpositibo hiya han Covid-19.
Ini an gintagan hin duon ni Jaguros han iya igpasamwak kakulop nga adlaw, Setyembre 30, 2021 nga nagpositibo hiya han virus.
Sumala han alkalde, hadton Setyembre 17, umabat hiya nga deri maupay an iya panlawas sanglit nag–isolate dayon hiya. Tulo ka adlaw nga nagbalik-balik an iya hiranat inupdan hin pag-inubo ngan nawara an pagnanam han iya dila.
Nakumpirmar nga na-igo hiya han kagaw han gumawas an resulta han swab test nga positibo hiya han Covid-19. Pero ginklaro ni Jaguros nga hapagkayana maupay na an kahimtang han iya panlawas ngan naghuhulat nala hiya nga matapos an mandatory quarantine period.
Kasumpay hini, iya iginsumat nga fully vaccinated na hiya ngan amo ini an nagin rason nga deri grabe an epekto ha iya han virus. Sanglit iya gin-aghat an publiko nga magpabakuna basi mapanalipdan an ira mga kalugaringon ug an tagsatagsa nira nga pamilya kontra han kagaw.
Iginpabati gihapon han alkalde an iya tim-os nga pagpasalamat ha Makagarahum sugad man an mga personales han Rural Health Unit ha pagtimangno ha iya. #
