Isumat.com/7:19AM, November 12, 2020
Personal nga iginpasamwak ni Giporlos, Eastern Samar Mayor Gilbert Go nga nagpositibo hiya han Covid-19.
Dida han iya pahayag ha facebook kagab-i, nagsumat hi Go nga usa hiya han bag-o nga walo nga pasyente han Covid didto han ira bungto. Sumala han alkalde, deri pa niya natutudlok kun diin hiya katapni, pero nagsering hiya nga pumakadto hiya ha Manila basi kuha-on an bag-o nga ambulansya han LGU.
Hadton Oktubre 28 umabot hiya ha Giporlos ngan kakulop, Nobyembre 11, matatapos na unta an iya duha ka semana nga kwarentina. Pero antis hini, ginsagdunan hiya han Rural Health Unit nga magpa swab test. Kakulop gumawas an resulta nga natapnan hiya ngan pito pa nga iba.
Kakulop mismo, hi Go in iginbalhin ha Isolation Facility han LGU ngan magpapailarum hin kadugangan nga 14 ka adlaw nga kwarentina. Iginpatapod naman han alkalde nga bisan kun deri hiya makikit-an, padayon an iya pagserbisyo ha mga Giporlosanon.
Hi Go in aada yana han iya syahan nga termino komo mayor han Giporlos. Kumandidato na hiya hadto pagka-alkalde pero naperde. Dida han iya ikaduha nga pagdalagan hadton 2019, nagmalinangpuson na hiya nga maangkon an pagigin amay han bungto.
Ha Eastern Visayas, tulo na nga alkalde an natapnan han virus. Amo ini hira Catbalogan City Mayor Dexter Uy nga naka-recover na; ikaduha hi Palapag, Northern Samar Mayor Manuel Aofang nga naawat an kinabuhi tungod han komplikasyon han Covid ha iba pa niya nga sakit; ngan an ikatulo hi Go.
An iba pa nga elected officials nga nagpositibo han kagaw ngan naka-recover na amo hira Northern Samar Congressman Paul Daza ngan Catbalogan City Councilor Stehpanie Uy-Tan.
Kakulop, mayda 141 nga bag-o nga nagpositibo han virus ha Eastern Visayas, sanglit 7,634 na an Total Cases ngan 6,879 (90%) an nakatalwas. An Active Cases yana in 683, samtang 72 nga Covid Patients an namatay.
Dida han bag-o nga mga kaso kakulop, 6 an tikang ha Tacloban, 39 ha Leyte, 26 ha Samar, 19 ha Eastern Samar, 50 ha Northern Samar ngan 1 ha Southern Leyte. #
