Isumat.com/Disyembre 9, 2021
Waray na katungod hi Balangkayan, Eastern Samar Mayor Allan Contado nga maghimo hin mga aktibidad ngan obligasyon hin usa nga abogado.
Ini in katapos la magpalusad hin kasugu-anan an Korte Suprema para han “Disbarment” han abogado nga alkalde tungod hin gross immorality han iya bayaan an iya asawa ngan pamilya basi makiglungon ha iba nga babaye.
Subay han report han Philippine News Agency, hadton Disyembre 4, an Korte Suprema in nagpagawas hin resolusyon kun diin nagkaka-uruyon an mga mahistrado han ira pagpamatood nga nakasala hi Contado han iginlalarang han “Code of Professional Responsibility and disbarred from the practice of law.”
Para han mga mahistrado, makukumparar nga adultery or concubinage an natabo kay an inasaw-an nga tawo in bumaya han iya tinood nga asawa ngan nakiglungon hin iba ug ini in dako nga imoralidad.
Nag-ugat ini nga kaso hadton 2015 han magsampa hin kaso administratibo hi Crisanta Hosaya kun diin unod han iya reklamo amo an petisyon pag-disbar han alkalde. Subay han pagsaysay ni Hosaya, mag live-in partner hira ni Contado.
Igin-asoy ni Hosaya nga sumugot hiya pakigtampo kan Contado kay nakumbinser hiya han pahayag han alkalde nga bulag hiya han iya legal nga asawa, ngan nagkaada hira hin duha nga anak.
Pero, hi Hosaya in nakabuksot nga an abogado in mayda relasyon hin iba pa nga babaye, ug pira ha ira an naburudan pa ngani han mayor.
Han nagkaka-ada na hira hin problema pinansyal, lumakat hi Contado ngan ginbayaan hiya ug an ira mga anak. Gindara gihapon han abogado an ira sarakyan.
Dida han depensa han alkalde, iya igindig-on nga waray niya plano nga deri igbalik an sarakyan, ugaring la mayda problema an sarakyan ngan deri mailob hin byahe tikang ha Balangkayan ngadto ha Manila. Igin-alegar pa ni Contado nga nabulos la hi Hosaya ha iya kay nagkaproblema na an ira relasyon.
Nagpakita pa hi Contado hin mga resibo hin kwarta ngan higamit nga iya iginpadara ngadto han ira mga anak ni Hosaya.
Gin-angkon ni Contado nga bulag na hiya han iya misis han magkakilala hira ni Hosaya.
Subay han korte, klaro nga aminado hi Contado nga nagkaada hira hin relasyon ni Crisanta, bisan kun mayda pa gahum an iya kasal han iya misis. Tungod hini nga iya pag-admiter, waray duda nga aminado hiya hin pagkaada hin kinabuhi nga paglipat-lipat ngan imoralidad.
Ha atubangan hini nga desisyon han hukmanan, an alkalde in may katungod pag-apilar han nasabi nga desisyon. Tobtob han ginsusurat ini nga notisya, waray pa pormal nga pahayag an kampo han alkalde tungod hini nga isyu.
Hi Contado in nagseserbe yana han ikatulo ngan pinal nga termino komo amay han Balangkayan.
Antis han iya karera ha pulitika, nagin usa hiya han mga hitaas nga opisyal han National Bureau of Investigation (NBI). Nagin hepe hiya han Anti-Graft Division ngan Spokesperson han ahensya.
Para han tiarabot nga eleksyon, hi Contado an 2nd Nominee han An Waray Partylist. # (With newsreport from PNA)
