Isumat.com/Setyembre 16, 2021
Deri makandidato ka senador hi Leyte 4th District Rep. Lucy Torres-Gomez ngan deri gihapon maghihingita hin ika-tulo nga termino komo alkalde han Ormoc City hi Mayor Richard Gomez.
An Ormoc Development Team (ODT) nga ginpapangunahan han magti-ayon nga Gomez in naghimo han ira pinal nga desisyon kagab-i durante han ira hiruhimagraw ngan didto ginkasarabutan ngan ginkumpirmar nga hi Lucy in makandidato ka mayor han syudad, ngan hi Richard in magpupuntirya han lingkuranan ha kongreso nga babayaan han iya misis.
Kun manunumduman, pira nga partido an nagkikinumbinseron kan Lucy nga umapi han ira senatorial line-up. Ini in ginkonsiderar han kongresista, pero ha katapus-tapusan, nagdesider an mag-asawa nga deri gud nira babakantehan an pagkapot han Ormoc.
Subay han report han Ormoc News and Updates, ginselyuhan na gihapon an linyada han grupo para han magkalainlain nga posisyon ha probinsya han Leyte ngan Ormoc.
Hi Vince Rama nga magtatapos han iya ika-tulo nga termino komo konsehal han Ormoc in madalagan pagka Board Member han probinsya, ug an iya misis, hi Carmen Jean in pagka konsehal han Ormoc an kakandidatuhan. Hira Carmen Jean ngan Lucy in magbugto.
Ha luyo nga bahin, an makandidato naman ka Ormoc Vice Mayor amo hi Carmelo Locsin, Sr nga amay ni Toto Locsin nga Bise-Mayor yana pero aada na ha ikatulo ngan katapusan nga termino.
An iba nga makandidato ka konsehal amo an mga re-electionista nga hira Lalaine Marcos, Atty Nolito Quilang, Atty Jasper Lucero ngan Roiland Villasencio.
An anay PBA player ngan yana negosyante Rey Evangelista in aada gihapon han line-up upod kanda Atty Burt Pades, Dr Edmundo Kierulf, Dr Goito Yrastorza, ngan Perok Rodriguez.
Waray pa masasabti tubtob yana kun hira hin-o nga mga personalidad an igkaka-atbang han hugpo nira Gomez dida hiton tiarabot nga pinili-ay. #
