Nagpalusad hin desisyon an Sandiganbayan nga guilty o salaan hi Mayor Sixto Dela Victoria han Albuera, Leyte ha kaso nga graft dara han pagpalit hin behikulo nga waray public bidding kun diin supak ini han procurement rules han gobyerno.
Dida han Marso 6, 2020 an 2nd Division han Sandiganbayan an nag promulgar han desisyon nga salaan hi Dela Victoria han kaso nga graft ngan ginsentensyahan nga mapreso hin 6 tobtob 8 anyos. Ini nga kaso in binmutho ha pagpalit hin military-type jeep hadton 2003 nga nagkakantidad hin 350 mil pesos.
Nagsering an Sandiganbayan nga an alkalde in gintagan hin otoridad han Sangguniang Bayan nga pumalit hin sarakyan ngan sumulod hin kontrata para hini nga panuyu-anan, pero deri karuyagsidngon nga waray na public bidding. An nahitabo, sumala pa han korte, an alkalde in naghimo hin direkta nga pakig kontrata ha 877 Motors Corporation nga amo an supplier han nasabi nga sarakyan. Nagsering pa an korte nga mayda pa man iba nga kompaniya nga habubo an presyo han sarakyan kontra han 877 Motors Corporation, pero waray natabo nga bidding.
Sumala pa han Sandiganbayan, an sugad hini nga mga klase hin transaksyon in nakakatalapas han Section 10 han Republika Acta 9184 (Government Procurement Reform Act) nga nagmamando nga igpaagi ha public bidding an ngatanan nga pagpalit hin mga higamit. Labot la han kapresuhan, iginmando gihapon han korte nga diskualipikado na hi Dela Victoria pagkapot hin posisyon ha gobyerno ha bug-os niya nga kinabuhi.
An desisyon in ginsurat ni Associate Justice Lorifel Pahimna, ngan gin-abuyunan nira 2nd Division Chairperson Oscar Herrera Jr ngan Associate Justice Michael Frederick Musngi.
Samtang ginsusurat ini nga notisya, waray pa masabti han Isumat.com an bubuhaton nga aksyon han kampo han alkalde kasumpay hini nga desisyon han Sandiganbayan. #
