Isumat.com/Hunyo 21, 2023
Ginpipinamiling pa han mga otoridad an usa nga nanay ug an iya anak nga menor de edad han magkawawara hira ha aksidente samtang sakay hin baloto ha Brgy Giparayan, Pambujan, N. Samar kakulop,. Hunyo 20, 2023.
Ginkilala han mga otoridad an mga biktima nga hira Eva Malazarte, 35 anyos; ug an an iya anak Hanna Marie Dula, 8 anyos. An magtala-iroy in nag-uukoy ha nasabi nga barangay.
Ha imbestigasyon han kapulisan, pasado alas 9 han aga, an mga biktima upod an mister ni Eva nga hi Ryan Dula in sakay hin baloto ngan tumabok han salog tikadto han ira umhanan.
Han tipado-ong na hira, nakiling an baloto rason nga nahulog an ira anak nga hi Hanna Marie. Lumukso dayon hi Eva ha paningkamot nga masalbar an iya anak pero tungod han kamakusog han agos han tubig, waray na kitaa an mga biktima ngan tobtob yana ginpipinamiling pa han search and rescue teams.
