Makuri nga sitwasyon an aatubangon han Department of Health-Region 8 kun tigda nga magkadurungan in damo nga kaso hin COVID-19 Positive denhi ha aton rehiyon. Ini an iginpahayag ni Dr. Minerva Molon, an Regional Director han ahensya kanina han aga.
Sumala kan Molon, dida han tres mil nga bed capacity han mga hospitals denhi ha Region 8, igin-andam an 10 porsyento hini o 300 beds para han mga COVID patients. Kasumpay hini, nanawagan hiya ha publiko nga maghirot gud hin hul-os kontra han makamaratay nga kagaw ngan ighatag an tim-os nga kooperasyon han mga kamanduan han mga otoridad basi kalikyan an sakit.
Kun an katawhan in masugot ha mga guidelines, magpapabilin nga maa-akos han ahensya an mga pasyente ngan deri hira magkakagaramo. Kun amo ini an kahimtang, deri mabubutang ha peligro an kinabuhi han publiko ug mga health workers, sering pa han opisyal.
Hapagkayana, waray nakikita nga problema an DOH kay dida han 253 nga swab samples tikang ha Region 8 nga iginpa-ilarum hin confirmatory testing, lima la an nag positibo han corona virus, ngan kun magpapadayon ini, waray duda nga akos gud han departamento an pag-asikaso ha mga pasyente.
Ini nga record han DOH-Region 8 in nagpapakita nga dida han suma-total han ngatanan nga samples, nagawas nga 1.9 percent la an nag positibo han corona virus.
Nagpasalamat gihapon an opisyal ha mga private ngan government hospitals ha iba nga parte han Sinirangan Bisayas nga nakarawat hin mga pasyente nga may mga mild symptoms han virus. Dara hini, deri na gindadara ini nga mga pasyente ha EVRMC kay gin-aataman na ha iba nga hospital. #
(Posted 3:48 PM, April 17, 2020)
