Ha deri maiha nga panahon, magigin hayahay na an biyahe han mga taga Southern Leyte tikadto ha Manila nga karuyag sumakay hin eroplano.
Ini in dara kay titikangan na an operasyon hiton Abril han kompaniya nga Air Southern Leyte han ira flights an Manila-Maasin City-Manila nga ruta pinaagi hin 30-seater nga eroplano. Sumala pa han impormasyon nga nakuha han Isumat.com, nakatalaan nga mabyahe an eroplano kada Lunes, Mierkules ngan Biernes kun diin mayda tagduha nga flights hito nga mga adlaw.
An Air Southern Leyte in usa han mga kompaniya han pamilya ni Mayor Elisa Cadingan, an alkalde han bungto han Hinundayan hini nga probinsya. Nagsering hi Cadingan nga ira ini paagi basi makabulig han ira igkasi mga taga Southern Leyte nga mas magin conveniente an byahe tikang ha ira lalawigan ngadto ha Manila kay yana manggud mabyahe pa hira para Tacloban City kun diin aadto an airport.
Labot la han mga taga Southern Leyte, maseserbehan gihapon hini nga operasyon an mga paghagrani nga bungto han Leyte sugad han Matalom, Bato ngan Hilongos labot la han mga negosyante ngan turista ha Manila nga karuyag pumakadto hini nga lugar.
An pamilya ni Mayor Cadingan in aada ha industriya han aviation kun diin usa nga piloto iton iya mister ngan tag-iya hira hin flying school.
Hapagkayana, ginpaplastar na han Civil Aviation Authority ug han kompaniya an mga detalye kasumpay hini nga operasyon.
