Isumat.com/7:12AM, October 13, 2020
Nakwelyuhan han mga otoridad ha buy-bust operation in usa nga lalaki nga umuli ha Caibiran, Biliran tikang ha Manila tungod kay nawarayan hiya trabaho didto.
Ginkilala an suspetsado nga hi Joel Manahon, 33-anyos, trabahador ha konstraksyon ngan nag-uukoy ha Brgy Manlabang, Caibiran.
Subay han report han Caibiran PNP Office, gindumara an operasyon han kapulisan hadton Domingo han kulop ha nasabi nga barangay. An mga operatiba han PNP in nakapalit hin usa ka sachet hin gintotoohan nga shabu tikang kan Manahon.
Nakuha gihapon ha iya in kadugangan nga duha pa ka sachet han iligal nga droga ug an marked money nga gingamit dida han operasyon. Kantidad hin Mil Kinyentos pesos an droga nga nakuha ha iya.
Dida han imbestigasyon, hinsabutan nga an suspetsado in construction worker ha Manila ngan napugos la pagbalik ha Caibiran kay nawarayan hiya trabaho tungod han Covid-19 Pandemic.
An suspetsado nga ginsampaan na hin mga kaso kasumpay han pagtalapas han balaud han iligal nga droga, in mahugot nga nanhimuwa han mga akusasyon kontra ha iya. #
