Isumat.com/Disyembre 7, 2021
Nag-antos hin igo hin bala in usa nga senior citizen ngan usa liwat nga ulitawohay dida hin magkalain nga insidente hin panmusil ha Calbayog City hadin Disyembre 3, 2021.
Dida han syahan nga panhitabo pasado alas tres han kulop, an biktima ginkilala nga hi Fernando Mancol, 70 anyos ngan inasaw-an in nalingkod la ha usa nga vulcanizing shop ha Brgy Pagbalican han tigda la may umulpot nga duha katawo nga nagpusil ha iya.
An retirado nga empleyado ha gobyerno nga biktima in naigo ha too nga tiil ngan kadagmitan gindara ha hospital ngan padayon yana gintatambal.
An mga suspetsado in dayon naman nangiskapo sakay hin motorsiklo.
Pagka alas 11:30 han gab-i, natabo naman an shooting incident ha Brgy Obrero kun diin an biktima in usa nga lalaki, 16 anyos ngan estudyante.
Pinusil hiya hin waray hikilal-i nga suspetsado nga deretso kumalagiw katapos han krimen.
An biktima in naigo ha too nga parte han iya nawong ngan gindara ha hospital basi tambalon.
An kapulisan in padayon nag-iimbestigar han duha nga insidente. #
