Isumat.com/9:09AM, June 4, 2020
Natapos na an lockdown nga iginpasunod ha mga bungto han Naval ngan Maripipi ha probinsya han Biliran kanina han alas 6 han aga.
Hi Mayor Gerard Roger Espina han Naval in nagpagawas hin kamanduan nga tapos na an Temporary Lockdown ha ira bungto. 24 oras unta an pagigin epektibo han lockdown nga gin-implementar kakulop han alas 2 han kulop.
Ginhimo ini nga pitad han LGU basi magdumara hin contact tracing han mga indibiduwal nga posible iginkahibalag han 19-anyos nga lalaki nga taga Naval nga nagpositibo han corona virus. Iginpasabot kakulop han udto han DOH-Regional Office ini nga impormasyon ug kadagmitan gumi-os an LGU-Naval para han contact tracing.
Dida han pahayag ni Mayor Espina, natapos na an contact tracing ug an mga tawo nga natudlok in ginmomonitor nayana.
Ha luyo nga bahin, iginmando gihapon ni Maripipi Mayor Joseph Caingcoy nga bulkason na an lockdown ha iya bungto tungod hini nga desisyon han LGU-Naval. Igin lockdown ni Caingcoy an iya bungto han mag lockdown kakulop an LGU-Naval.
Sumala kan Caingcoy, puede na liwat bumiyahe an mga pampasahero nga pumpboat tikang ha Maripipi ngadto ha Naval ngan Kawayan. Ginklaro han alkalde nga an iya pitad in pagsuportaa han desisyon ni Mayor Espina han Naval. # (KEVIN SIOSANA)
