Isumat.com/7:49AM, August 17, 2020
Kadam-an han mga nagpopositibo han COVID-19 ha Eastern Visayas amo an mga Locally Stranded Individuals (LSI) nga nakabalik tikang ha iba nga lugar, pero dida han nag-agi nga duha ka adlaw, haros tanan han natapnan ha Tacloban City in waray travel history.
Dida han Sabado, Agosto 15, upat an natapnan nga Taclobanon. Tulo ha ira in mga local residents ug an usa naman in tikang ha Batangas.
Kakulop (Agosto 16), an bag-o nga nagkatatapnan amo ini: 21-anyos nga babaye, 69-anyos nga babaye, 54-anyos nga lalaki, ug 33-anyos nga lalaki nga nagbiyahe denhi la ha sulod han rehiyon. An tulo in waray travel history. Ini nga upat in ginkuhaan han ira swab samples ngan confirmatory test ha Divine Word Hospital.
Hapagkayana, 64 na an naka-recover dida han 89 nga nag positibo ha Tacloban ngan mayda 25 nga Active Cases. Pira han mga Local Transmission Cases han syudad in deri pa natutudlok kun hin-o an nakatapon o diin nga lugar katapni.
Ha kabug-usan naman han Eastern Visayas, 1,585 na an natapnan han kagaw ngan 1,019 (64%) an naka-recover tikang han virus. Mayda yana 560 nga Active Cases ngan unom nga pasyente an namatay. 125 naman nga Health Workers an nagkatatapnan.
Padayon naman an Hard Lockdown nga ginpapasunod ha Brgy Villa Aurora ha Basey, Samar kun diin 50 na nga residente an natapnan. Waray pa gihapon kasabti kun diin tikang an virus nga nakadarahig dida han barangay.
Ha bungto naman han Isabel, Leyte ginpasadhan hin usa ka semana an ira munsipyo basi magdumara hin disinfection katapos la nga magpositibo hin virus an usa nga health personnel han bungto nga pumakadto han munisipyo. #
