Tacloban City – Iton Mayor na han Tacloban it may gahum pag tudlok han mga board of directors han Leyte Metropolitan Water District (LMWD) ngan deri na iton Governor hiton Leyte. Ini in maahuman nga magin penal na an desisyon han korte suprema nga nag dedeklara han section 3 (b) Presidential Decree number 198 nga talapas han 1987 constitution.
Sumala kan Bernardita Valenzuela han Tacloban City information office ha interview han programa nga “Straight to the Point” han RMN Tacloban, an mao nga desisyon in subay han kaso ha butnga han provincial government han Cebu ngan han city government of cebu may kalabutan han isyu kon hin-o an may gahum pag tudlok han mga board of directors han Cebu Metropolitan Water District.
Subay han section 3 (b) han PD 198 nga an local government unit nga may 75 percent nga mga tag kunsumo han tubig ha usa nga water district, an Mayor o governor amo an may gahum pag tudlok han mga board of directors hini.
Ha desisyon han korte suprema kinahanglan la nga 51 percent an kadamoon han mga connections han tubig agud matagan hin gahum an mayor or governor ha pag tudlok han mga board of directors.
Aada na ha 62 percent an total han mga water connections han Tacloban hinungdan han pag appoint hi Mayor Cristina Romualdez han bag-o nga mga board of directors han LMWD sumala pa kan Valenzuela.
An gin appoint nga mga board of directors amo hira Engineer Roberto Munoz, Atty. Bautista G. Corpin, Atty. Jennylyn Manibay, Atty. Sharilee Mauro ngan Bernardita Valenzuela.
Pamati han interview kan Bernardita Valenzuela.
