Isumat.com/12:45PM, November 16, 2020
Imbes nga duha la ka semana, nahimo nga usa ka bulan an deployment han mga linemen han elektrisidad nga tikang ha Region 8 didto ha Bicol Region.
Dida han katapusan nga semana han Oktubre, nagkalakat tikadto ha Albay an mga linemen han magkalainlain nga kooperatiba han elektrisidad ha Eastern Visayas basi bumulig pag-ayad han nagkaguguba nga linya han kuryente tungod han Bagyo Rolly. Kakulop, Nobyembre 15, mabalik na unta ha Region 8 an nasabi nga mga personales.
Dida han pahayag ni Allan Laniba, General Manager han DORELCO ngan LEYECO III, an mga opisyal ha Albay in naghangyo nga pahilawigon pa an estada han mga taga Eastern Visayas nga linemen nga adto yana ha Bicol. Hinungdan hini, tobtob pa hiton katapusan hini nga bulan an trabaho han mga linemen didto ha Bicol.
Dako pa hin duro an trabahoon ha Bicol ha pagpabalik han normal nga serbisyo han elektrisidad, sering pa ni Laniba. Nakadugang pa hini kay an iba nga taga Luzon nga linemen in pumakadto liwat ha Cagayan, Isabela ngan Quezon basi bumulig han nadistroso ni Bagyo Ulysses.
Nagsering hi Laniba nga waray magruhaduha an mga linemen ha pagtangdo han hangyo han mga Bicolano, sanglit magpapabilin hira didto tobtob yana nga Nobyembre. Waray liwat problema hini kay hi-ara na hin sugad hini nga sitwasyon an nasabi nga mga linemen , pahayag pa ni Laniba.
An mga Rural Electric Cooperatives denhi ha Region 8 in nagpadara hin haros 100 nga linemen ngadto ha Bicol katapos la nga pagbayuhon ni Rolly an rehiyon.
Nagpapasalamat naman hi Laniba ha mga LGUs didto ha Bicol kay gintitimangno hin tim-os an mga personales tikang denhi ha rehiyon Otso labi na gud an ira pagkaon. #
