Life imprisonment ngan multa nga tag 5 million pesos an guin pataw nga sentinsiya han Regional Trial Court han Gandara han lima nga mga mga akusado nga nadakpan han mga kapulisan nga may dara nga 600 million nga kantidad hin shabu duha na ka bulan an nakaka labay.
Dida han desisyon nga guin palusad ni Judge Esteban dela Pena nga may petsa nga december 14, 2019 convicted hira Cesar Uy, 49, han Gen. Trias, Cavite; Elbert Abella, 57, han Toledo City; ngan hi Leonard delos Reyes, 33, Steven Perez, 37, ngan Jeralou Lobarte, 34, nga puros mga taga Cebu City.
Labot la kan Jeralou Lobarte nga dada-on ngadto ha Correctional Institution for Women ha Mandaluyong City, an iba in dadad-on ngadto ha Leyte Regional Prison agud didto hira prisohon ha bug-os nira nga kinabuhi.
An mga kapulisan han Gandara ngan han mga miemro han Provincial Drug Enforcement Unit ngan Regional Drug Enforcement unit amo an naka dakop ha mga akusado ha usa nga checkpoint hadton October 17, 2019 nga dara an sobra 80 kilos nga shabu nga karga hin duha nga sarakyan nga tikang ha Cavite ngan ha Quezon City tikadto na unta ha siyudad han Cebu.
