Patay in usa nga empleyado han gobyerno ngan samaran liwat in usa nga barangay kapitan dida hin magkalain nga insidente hin pamusil temprano pa kanina han aga, Marso 3, ha Eastern Visayas.
Hi Alvin Estrelles, 47 anyos, nga empleyado han Gandara, Samar Municipal Disaster Office an binawian hin kinabuhi han paarakan hiya hin bala hin deri pa kilalado nga mga suspetsado, alas 7:40 han aga ha Brgy Adela Heights han nasabi nga bungto.
Subay han inisyal nga imbestigasyon, hi Estrelles in sakay han iya motorsiklo ngan tipa-uli na ha ira balay han pagpusilon hiya han mga suspetsado nga sakay hin sports utility vehicle nga waray plaka. An biktima nga nag-antos hin kadam-an nga igo hin bala ha lawas in dayon nga namatay ha lugar mismo han krimen, samtang an mga suspetsado in naka-eskapo.
Didto naman ha Abuyog, Leyte, an kapitan han Brgy. Canmarating in gingamaan gihapon ug nag-antos hin mga igo hin bala kanina han alas 5:45 han aga didto mismo han iya barangay.
Nalutaw ha imbestigasyon, hi brgy Chairman Julian Saldua Jr, 47 anyos ngan inasaw-an, in nagdya- jogging ha iya lugar han tigda la umulpot ha iya luyo an mga suspetsado sakay hin motorsiklo ngan pauranan hiya hin punglo.
Naigo hi Saldua ha pira nga parte han iya lawas, pero nakahimo ini hin pakabulos pagpabuto pinaagi han iya dara nga kalibre .45 nga pistola. An mga suspetsado in kadagmitan nga kinmalagiw han bumulos pagpabuto an ira target. An biktima in gindara ha usa nga hospital ha Tacloban City basi pagtambalon.
Ginkilala an mga suspetsado nga hira Vincent Tisbe, nga anay kaapi han PNP, ngan Boboy Villote nga mga residente liwat han mao nga barangay.
Usa han mga anggulo nga ginkikita han mga otoridad in personal nga away ha butnga han biktima ngan suspetsado.
Padayon naman nga gin-iimbestigar ngan paghalpat han mga suspetsado an ginhihimo han mga kapulisan. #
