Isumat.com/Hunyo 9, 2022
“Ako it magpapatilaw kan Naoya Inoue han iya syahan nga kaperde ha igbaw han boxing ring.”
Ini an ginbul-iwan nga saad han taga Merida, Leyte nga hi John Riel Casemiro, an anay WBO bantamweight title-holder, kataliwan la nga makadaog an Japanese champion kan Filipino boxing great Nonito Donaire pinaagi hin 2nd round knockout dida han ira Unification Fight hadin Martes, Hunyo 7, 2022.
Sumala kan Casimero, ginhimo ni Donaire an ngatanan pero waray swerte nga makadaug. Sering pa niya waray iba nga makakaperde han binansagan nga Monster kundi hiya gud la.
Hira Inoue ngan Casimero an igintalaan nga magkakapanta han 2020 pero nadiskarel ini tungod han pandemya.
Duha ka beses nga iginbalhin an schedule basi madayon an asdangay, pero waray ini katuman dara hin damo nga isyu labi na an pagbiyahe ni Inoue.
Hinungdan hini, nagsering hi Casimero nga nahahadlok ngan nagtatalaw an Hapon nga makig-away ha iya, sanglit damo an ginhihimo nga pasangil basi makalikay han ira bangaay.
Hi Inoue an nagkakapot yana han mga korona para han IBF, WBA ngan WBC.
An WBO crown in bitbit yana ni Paul Butler. An titulo han WBO in ginkakatinan anay ni Casimero pero ginlaknit ha iya tungod han duha ka beses nga iya kapakyas nga depensahan ini kontra kan Butler. waray madayon an ira title bout duha ka beses kay pirmi may rason nga problema ha panlawas hi Casimero.
Yana, iginsasaad ni Casimero nga hiya an magpapatumba kan Inoue basi makabawi han kaperde ni Donaire.
Hi Inoue in nangayat na kan Paul Butler ngan iya plano nga kun maaagaw niya an korona ni Butler, masaka hiya tikang ha bantamweight ngadto ha super-bantamweight class. #
