Isumat.com/Hunyo 11, 2021
Kinahanglan mawara an ngaran ni Leyte 3rd District Rep Vicente Veloso III ha Narco-Politicians List han mga ahensya han gobyerno.
Ini in subay han iginpagawas nga resolosyon han Court of Appeals hadin Hunyo 8, kun diin ginmamanduan an PDEA, PNP, AFP, DILG ngan NICA nga tanggalon hi Veloso dida han listahan. Kun manunumduman, antis an pinili-ay hadin Mayo 2019, hi Presidente Duterte an nagpagawas han mga ngaran han pulitiko nga gin-aalegar nadadabi ha operasyon han iligal nga droga. Hi Veloso in usa dida han lista.
Ini in mahugot nga igindiwara han magbabalaud. Sumala ha iya, waray ginpapatamakan ini nga alegasyon. IYa pa ginsusnan an paghilakip han iya ngaran tungod kay harani na hadto an eleksyon.
Tungod hini, hi Veloso in nagsampa ha Court of Appeals hin Writ of Habeas Data. Usa ini nga legal nga paagi para han bisan hin-o nga nakaka-abat nga mayda hulga o tarhog ha iya kinabuhi ngan seguridad dara hin paghikay hin mga impormasyon nga supak ha balaud an proseso.
Dida han desisyon, nagsering an korte nga napamatud-an ni Veloso nga namemeligro an iya katalwasan tungod hini nga narco-list. Sumala pa han CA, waray nahipakita nga madig-on nga rason an mga ahensya han gobyerno basi igpabilin an ngaran han magbabalaud ha listahan.
Ginklaro naman han korte nga an ira desisyon in deri makakapugong han gobyerno nga magsampa hin kaso kontra kan Veloso ha ti-arabot nga mga panahon basta may bastante nga ebedensya ngan igpapaagi ha insakto nga proseso.
An 8th Division han CA nga nagpalusad han desisyon in ginkokomponer nira Justices Germano Legaspi, Apolinario Bruselas ngan Ruben Roxas.
Antis nagin congressman hi Veloso, nagin hurado hiya han Court of Appeals hin 11 anyos. #
