An Provincial Government han Leyte in may plano nga himoon nga isolation facility an gymnasium ha Leyte Academic Center ha Palo, Leyte.
Ini an iginsumat ni Dr. Lesmes Lumen, an Leyte Provincial Health Officer, dida han press conference nga ginbuhat han DOH-Region 8 kakulop kun diin ginkumpirmar an syahan nga COVID-19 Positive case han lalawigan.
Sumala kan Lumen, waray gad naghihingyap nga magtikadamo pa an kaso han corona virus, pero kun maka-abat an LGU-Leyte Province nga nadudugangan an ihap han mga pasyente, ipapatuman nira an plano nga ig-convert la anay an LAC Gymnasium nga magin isolation facility.
Kun mahimo ini nga COVID facility, makaka-akomodar ini nga building hin 130 beds para han mga pasyente, sering pa ni Lumen.
Dida gihapon han press conference, iginsumat han opisyal nga kadagmitan nagmando hi Leyte Governor Mic Petilla ha Provincial Health Office nga himoon dayon an contact tracing han mga tawo nga iginka-upod-upod han nag positibo han virus nga babaye ha Burauen, Leyte.
Igindugang pa ni Lumen nga nagdesisyon hi Petilla nga deri pahita-ason an level han community quarantine han probinsya kay usa man la nga bungto an may pasyente han makamaratay nga kagaw. #
(Posted 7:53 AM, April 18, 2020)
