Isumat.com/Pebrero 24, 2022
Nagpapadayon an serye hin panmatay ha Calbayog City, Samar.
Kakulop, Pebrero 23, natabo in usa nga insidente hin panmusil banda alas 8 han gab-i ha Purok I, Brgy Carmen han nasabi nga syudad .
Dida han report han Samar Daily News Online, an biktima nga binawi-an hin kinabuhi in ginkilala nga hi Ruben Espelembergo. Hi Espelembergo in bag-o pala nga nakagawas ha karsel kay napreso hiya tungod hin murder case.
Waray panhikilal-i an mga responsable han nasabi nga krimen.
Hadton Pebrero 18, hira Manuel Sameniano ngan Ronik Wahingon in ginpa-arakan hin bala tobtob han kamatay ha Brgy Olera, Calbayog.
Pasado alas 9 han gab-i han patayon hin pito nga mga suspetsado hira Sameniano ngan Wahingon.
Usa han mga suspetsado in na-aresto na han mga otoridad ug ini in ginkilala nga hi Anling Wahingon, kagawad han mao nga barangay.
Hadton Pebrero 9, an SK Kagawad han Brgy Migara nga hi Gerald Casaljay in namatay han gamaan didto ha Brgy Osmena, Calbayog City.
Hi Casaljay in nag-antos hin mga igo hin bala ha dughan ug ha wala nga parte han nawong. Nakatalwas naman an iya kaupod dida han panhitabo. #
