Isumat.com/1:08PM, September 9, 2020
Tungod han grabe nga depresyon ngan kabido-an, waray na ma-akos hin usa nga lalaki an iya ginpapas-an nga problema, ngan nagdesider hiya pagpakamatay.
Ini nga insidente hin suicide in natabo temprano pa han gab-i Setyembre 8, ha Villa Sophia Village, Brgy 108, Tagpuro, Tacloban City kun diin ginkilala an biktima nga hi Rafael Jaca.
Subay han imbestigasyon, an bugto han biktima in nakabasa han post ha facebook ni Rafael nag-aasoy han mabug-at nga iya problema. Gintutudlok nga an rason han iya depresyon amo an paglakat han iya live-in partner ngadto ha Manila upod an ira duha nga anak han nag-agi nga tuig.
Dida han iya facebook post, nagsering hi Jaca nga waray na niya gin-aabat nga kalipayan ngan deri na niya maantos an kamasulob-on.
Han makabasa hini nga post an iya bugto, kadagmitan hiya pumakadto ha balay han biktima, iya ginpwersa pag-abri an sarado nga portahan ngan iya nadiskubre an nabitay nga patay nga lawas ni rafael.
An 20-anyos nga biktima in nagtatrabaho hin pribado nga establisemento ha syudad han Tacloban.#
