Gintiwasan hin usa nga lalaki an iya kalugaringon nga kinabuhi katapos niya pagtigbason an iya ka live-in partner ha Batangon, Leyte hadin nakalabay nga adlaw.
An nagpakamatay in ginkilala nga hi Roger Agner, 38 anyos, samtang an samaran nga iya ka-partner amo an 40 anyos nga hi Elena Coronya. Hira ngaduha in nag-uukoy ha Brgy Sangputan han nasabi nga bungto.
Nagawas dida han imbestigasyon han mga otoridad nga pira na ka semana nga waray mahimumutang ngan deri nangangaturog an suspetsado. Pag-abot hadto nga makarimadima nga takna, hi Agner in pumakadto ha kusina ngan kumuha hin sundang ngan dumaop ha iya asawa ngan tigda nala niya ini ginpaninigbas.
Hi Coronya in nag-antos hin mga kasamdan ha magkalainlain nga parte han iya lawas. Kataliwan hini, kahuna seguro han suspetsado nga patay na an iya misis ngan dida hini iya ginbuno-buno an iya tiyan.
Nadara ha hospital an mag-asawa pero igindeklarar han Babatngon Municipal Health Office nga Dead on Arrival hi Agner, samtang nakatalwas naman an iya padis ngan padayon yana gintatambal.
An mga imbestigador han Babatngon PNP in naka-recover hin 24-pulgadas nga sundang nga gintutuohan amo an gingamit han suspetsado dida hini nga krimen. #
(Posted 8:12 AM, April 16, 2020)
