Isumat.com/9:00AM, May 28, 2020
Nakasentro yana an imbestigasyon han kapulisan han Carigara, Leyte PNP kun ano an nakagduso hin usa nga lalaki nga pusilon ngan patayon an iya magurang nga bugto.
Nagmamalatumat an police report nga hi Lorie Eria, 30 anyos in nagtagay-tagay anay hin makahurubog nga irimnon hadin nakalabay nga adlaw. Han impluwensyado na hiya han alcohol, pumakadto ini ha balay han iya bugto ha Brgy Canlabi ngahi Edwin Eria, 39 anyos.
Pag-abot ngadto, waray damo nga seremonyas tigda nala ginpa-uranan hin bala ni Lorie an iya kuya. Naigo an biktima ha magkalainlain nga parte han iya lawas rason han iya kamatayon.
Umiskapo naman dayon an suspetsado katapos mabuhat an krimen.
An kapulisan han Carigara PNP in padayon yana an paghalpat han suspetsado. # (KEVIN SIOSANA)
