Nagpapakabuhi la intawon pero nadisgrasya ngan namatay in usa nga laborer ug nagkaada hin karamtan ha lawas an iya kaupod ha trabaho han mahulugan hira hin mga semento nga gindidiskarga ha Port Area han Tacloban.
Nagpapakita an report han kapulisan nga alas 4 han kulop, Marso 15, usa nga cargo vessel an nagdidiskarga hin semento pinaagi han crane. Dida hito nga takna, aksidente nga nautod an kable han crane ug iginkatuman nga an mga biktima in namumutang ha lugar nga nahulugan han damo ka bag han semento salit nadat-ugan hira.
Ginkilala an namatay dida hini nga insidente nga hi Arthur Zamora, nga residente han Brgy. 37 han Tacloban, samtang an iya kausa ha trabaho nga nagkaada hin karamtan ha lawas nga hi Tirso Macapanas.
Hi Zamora an gindeklarar nga dead on arrival ha hospital, samtang hi Macapanas in gintatambal liwat yana ha hospital.
Subay pa han panguna nga imbestigasyon, mga taga Cotabato an kapitan ug an crane operator han barko. #
