Opisyal na nga ginpahilawig an kwarentina denhi ha syudad ha Tacloban. Ini an unod han Executive Order No. 2020-04-19 ni Mayor Alfred Romualdez nga iginpagawas kagab-I, Abril 9, 2020.
Antis pa gumawas in inga mando ehikutibo, nagsarang na an mga notisya nga magkakamay-ada hin extension an kwarentina ha Tacloban, pero an isumat.com in naghulat anay han opisyal nga pahayag antis igpublikar in inga notisya.
Dida han kamanduan han alcalde, an extension in magtitikang han Abril 13 tobtob Abril 28, 2020.
Ha ilarum hini nga kasugu-anan, ginpa istrikto pa an pag-implementar han mga pitad kontra han pagsarang han COVID-19. Upod na denhi an mandatory nga pagsul-ot han face mask han ngatanan nga naukoy, nagtatrabaho ngan nasulod ha Tacloban. Igindederi gihapon para han mga burod, senior citizens, mga menor de edad, mayda mga sakit an pag ginawas gawas han panimalay.
An mga katitirok, sugad han operasyon han bulangan, sinehan ngan iba pa nga kali-awan in deri gihapon puede, Ginpapasunod gihapon an liquor ban ha sulod ngan gawas han balay.
Magpapabilin gihapon nga suspendido an klase ha ngatanan nga levels samtang ginpapatuman an kwarentina.
Iginlalarang gihapon han kamanduan nga deri makakasulod ha Tacloban an mga residente han mga lugar kun diin may nag positibo han COVID-19.
Magpapabilin gihapon nga deri tutugutan nga makasulod ha Tacloban in bisan ano nga klase hin pampubliko nga transportasyon tikang ha iba nga lugar, pero magpapadayon an biyahe han mga jeep, multicab ngan tricycle ha sulod han syudad. #
(Posted 3:46 AM, April 10, 2020)
