Isumat.com/6:39AM, November 2, 2020
Waray natatabo nga kurapsyon ha DPWH Tacloban City Engineering District, sumala han nangungulo han ahensya nga hi Engr Arnaldo Bonifacio.
Ha panmaki-ana han Isumat.com, nag-asoy hi Bonifacio nga waray mga kaso nga iginsampa kontra han ira buhatan ngan nagpapabilin nga limpyo hin anomaliya an mga opisyales ngan personales sugad man transaksyon han ira distrito.
Kun manunumduman, hi Presidente Duterte an nagmugna hin Task Force nga mag-iimbestigar han mga anomaliya ha ngatanan nga ahensya han gobyerno ngan usa han nangunguna ha listahan han Presidente amo an DPWH.
Nagsering hi Bonifacio nga posible may katatapuran nga surok hin impormasyon an Presidente nga may mga anomaliya ha DPWH, ngan bangin ini ha iba nga rehiyon o Engineering Districts. Pero igindig-on han District Engineer nga kun an iya distrito an paghihingadayan, segurado hiya nga waray mantsa hin tinuyaw nga transaksyon an iya nasasakupan.
Kasumpay hini, nanawagan an enhinyero ha publiko nga kun mayda man nira nasasabutan nga deri matadong nga binuhatan an iya opisina o mga tauhan, deri mag-alang pagreklamo basi mabaton ini ngan maklaro kun tinood o deri.
Nag-esplilkar pa hi Bonifacio nga imposible makahimo hira hin tinuyaw dara han nagsasapin-sapin nga pagsusi han Commission on Audit sugad man mismo han ira Internal Auditors tikang ha bidding, durante han construction ngan katapos han proyekto.
Waray gihapon natatabo nga pakigkuntsaba ha butnga han ira opisina ngan Leyte 1st Dist Congressman Martin Romualdez kay klaro ngatanan an mga proyekto nga karuyag ig-implementar han magbabalaud ngan mayda liwat nira kalugaringon nga mga proyekto nga na-agi han waray ginpapaboran ngan abri ha publiko nga proseso han transaksyon.#
