Isumat.com/7:40AM,July 02,2020
Kinahanglan deri hikalimtan an mga pitad basi makalikay han sakit nga dengue. Ini an nagin pahimatngon han DOH Regional Office tungod han damo la gihapon nga kaso han dengue ha Rehiyon Otso.
Tikang han Enero tobtob Hunyo 2020, siyam na katawo ha Sinirangan Bisayas an binawi-an hin kinabuhi dara hini nga sakit nga gindadara hin apektado nga lamok nga nakakatukob han tawo. Ini nga ihap han namatay tungod han dengue in darudamo kontra han tulo ka tawo nga tumalikod ha kadayunan dara han COVID-19.
Umabot na ha 4,114 an nagin pasyente han dengue ha bug-os nga rehiyon han nasabi nga panahon. Pero ini in haruhabubo hin 35 porsyento han insidente han dengue han una nga tuig. Kay dida han Enero-Hunyo 2019, sobra 6 Mil an kaso hin dengue ngan 27 an namatay.
An Leyte an may gidadamu-i nga dengue cases kay nakagrehistro hin 2,128 nga kaso an probinsya hito nga panahon.
Utro nga nagpahinumdom an ahensya han panlawas ha publiko nga pirmi limpyuhan an kalibungan ngan deri magbi-aw hin tubig ha gawas ngan sulod han balay basi deri pagpugaran han dengue. Ginhimo ini nga panawagan han DOH yana nga nagtikang na an panahon han kat-uran kun diin ginkakabarak-an nga humitaas pa an maaalakbatan han dengue. # (KEVIN SIOSANA)
