Isumat.com/9:10AM, April 22, 2020
Dara han kataragman nga gin-aatubang han mga kapulisan labi na an aada ha mga checkpoints, nagdesisyon an Leyte Provincial Police Office nga pabakunahan hin Anti-Pneumonia Vaccine an ira mga tauhan.
Iginsumat ni Major Margarito Salano, an tagyakan han Leyte PPO, importante nga magkaada han anti-pneumonia vaccine an ira mga personales labi na an frontliners basi deri madarahigan han sakit nga pneumonia labi na yana nga panahon han COVID 19 health crisis.
Nagpahayag hi Salano nga sobra na 600 nga kapulisan han probinsya han Leyte an nabakunahan han nag-agi nga semana, samtang maabot pa hin mil kinyentos an nakatalaan magpabakuna.
Samtang, an PNP-Regional Office 8 in nag-andam na hin isolation facility kun umabot an takna nga may mga personales han PNP nga magin suspect, probable o positibo han virus.
Nagpahayag hi Regional Director BGen Bernabe Balba nga may building ha ira kampo nga ginhimo nga isolation facility ug puede ini maka-akomodar hin lima ka tawo. Mismo an mga doktor ngan nurses han PNP Regional Health Service an magdudumara han facilidad. #
