Isumat.com/Oktubre 31, 2021
Hayahay nga mamamasyada ngadto han ira pagdarag-an pagka gobernador ngan bise-gobernador ha Southern Leyte an magbugto ngahira Damian ngan Imelda “Melay” Mercado.
Ini in katapos la mag-withdraw han ira tagsatagsa nga kandidatura hira Mike Maamo ngan Albert Esclamado para han nasabi nga mga posisyon dida han tiarabot nga eleksyon sunod nga tuig.
Iginsumat ni Southern Leyte COMELEC Supervisor, Atty Antonio Gulay, nga igin-atras nira Maamo ngan Esclamado an ira kandidatura hadin nag-agi nga semana, sanglit waray na magigin ka-atbang an magbugto nga Mercado.
Hi Incumbent Governor Damian Mercado in nagpupuntirya han iya ikatulo nga termino, samtang an iya bugto nga hi Melay in naghihingita han syahan nga termino komo bise-gobernador.
Ha ilarum han regulasyon han COMELEC, deri na puede nga may maliwan kanda Maamo ngan Esclamado tungod kay mga independiente hira nga kandidato. An substitution in matatabo la kun mayda gindadara nga partido an umatras nga kandidato ngan ira ka-urusa ha partido an maliwan ha ira.
Subay han impormasyon, iginrason ni Maamo an iya pagbakwi han kandidatura tungod kay dako an iya obligasyon komo nangungulo hin Foundation ha Manila, labot la han iya pagdumara hin pribado nga eskwelahan ha Liloan, So. Leyte. Hiya in nagin board member ngan Vice-Governor han lalawigan hadto nga panahon. Dumalagan hiya ka gubernador hadton 2019 pero naperde.
Ha luyo nga bahin, hi Esclamado in nagsering nga “family reason” an hinungdan han iya pag-atras. Hiya in nagserbe hadto nga board member han probinsya.
Tungod hini, nagpapabilin nga nagtitikadig-on an pagkapot han poder han pamilya Mercado ha Southern Leyte.
An kandidato ka kongresista amo hi Luz Mercado nga misis ni anay Cong. Roger Mercado nga gintudlok ni Presidente Duterte komo bag-o nga DPWH Secretary.
An mga anak nira Roger ngan Luz nga hira Nacional amo an mayor han Maasin City: ngan hi Michael in konsehal han nasabi nga syudad.
Hira Roger, Damian ngan Imelda in magburugto. #
