Kun nagsasarang an corona virus ha bug-os nga kalibutan, padayon liwat nga nagtitikadamo an mga parte hin kadagatan denhi ha Eastern Visayas nga nadidistroso red tide poisoning.
Dida han gibabag-uhi nga shellfish advisory han Bureau of Fisheries and Aquatic Resources o BFAR, nahidugang an kadagatan ha Calubian, Leyte dida han mga lugar nga apektado han tinatawag nga paralytic shellfish poisoning o mas kilalado nga red tide.
An iba nga mga apektado yana han red tide amo an masunod : Irong-irong Bay ha Catbalogan, Samar; San Pedro Bay nga nakakasakop han Basey ngan Marabut, Samar; Matarinao Bay nga nakakalukop han Salcedo, Hernani ngan MacArthur ha Eastern Samar; Cancabato Bay ha Tacloban City; ngan Carigara Bay kun diin sakop an mga kadagatan ha Carigara, Capoocan, Barugo ngan Babatngon, Leyte.
Dara hini an BFAR in mahugot nga nagpapahimatngon ha publiko nga deri la anay manguha, magbaligya ngan kumaon hin pangti-on tikang hini nga mga kadagatan dara han peligro ha panlawas hiton tawo.
Ginsasagdunan gihapon nga limpyuhan hin maupay an sulod han ginhawa han isda ngan kuhaon an hasang hini ugsa paglutoon.
An BFAR in padayon nga nagmomonitor hini nga mga kadagatan basi maseguro an katalwasan han publiko ngan makaghimo dayon hira hin pitad basi deri mag alos-os an shellfish industry ha Rehiyon Otso. #
