An maluya nga signal han internet connection an usa nga nagin issue han gin dumara nga mock election han Commission on Elections (COMELEC) ha siyudad han Tacloban hadton December 29, 2021 ha duha nga mga eskwelahan nga amo an Panalaron Central School ngan Sto Niño Elementary School.
Ini an gin sumat ni Atty. Goretti C. Caña an City Election Officer han Tacloban ha interview ni Eduard Sañagan haiya programa nga “Straight to the Point” ha 99.1 IFM RMN Tacloban.
Sumala kan Atty. Caña nga gin dara pa an Vote Counting Machine (VCM) ha gawas han classroom tikadto han lobby han eskwelahan para la magkaada hin maupay nga signal han internet
Pero ha luyo hini, bisan pa kon nagin mahinay an internet connection nagin malinangpuson an pag padara han nagin resulta han mock election tikang ha presinto ngadto ha city board of canvassers ngan ngadto liwat ha provincial board of canvassers sumla pa kan Atty. Caña.
Labot la hini, mayda liwat higayon nga waray dayon mahigawas an balota nga gin sulod ha VCM ngadto ha ballot box pero ini in deri gud problema tungod nga mayda mga higayon nga nahi tatabo ini ha pag dudumara han mga nag labay nga eleksyon ngan ini in na depende la han pag plastar hin maupay han VCM.
200 nga mga botante an nag partisipar han mao nga mock election tikang hin duha nga barangay han Tacloban nga amo an barangay 6 ngan 106 ngan ha pira nga mga lugar ha Pilipas sugad Taguig City, Pateros ngan Pasay City ngan sugad man ha Isabela, Albay, Negros Oriental, Maguindanao ngan Davao del Sur nga an panuyo mahibaruan iton posible nga mga problema ngan agud ini in ma likyan hiton pag dudumaraon nga national and local eleksyon hiton Mayo Nuve yana nga tuig.
An mahinay nga signal han internet in gin padangat na ngadto han mga telecommunications company para masiguro nga ini in deri mahinanabo pagabot hiton takna han eleksyon.
