Isumat.com/7:18AM, December 18, 2020
Tobtob yana nga mga panahon, an gobyerno pinaagi han Philippine Charity Sweepstakes Office (PCSO) in waray pa tumugot nga igbalik an operasyon han ngatanan nga pamulay o bola han mga Numbers Game.
Kun aton manunumduman, han magtikang an Covid-19 Pandemic dida han Marso 2020, ginsuspender han PCSO an ngatanan nga Games komo pitad basi makabulig nga deri magtikagrabe an pagsarang han virus. Duha na ka bulan an nakalabay, naghinay-hinay an PCSO nga igbalik an pira nga pamulay sugad han 6/42, 6/45, 6/49, 6/55, 6/58, Easy-2 ngan Swertres. Ini in gintugutan na pagmulay denhi ha Leyte.
Pero WARAY KATUGUTAN an PCSO ha bisan kankanay nga grupo nga magdumara han PERYAHAN NG BAYAN denhi ha Leyte. Ha kamatuoran, naha-una pa nga ginpa-undang an Peryahan hadton Enero 2020. Ini in subay han Memorandum nga pirmado ni Executive Secretary Salvador Medialdia nga iginpadangat ha PCSO.
Dida han nag-agi nga pira ka adlaw, may mga katawhan nga duma-op ha Isumat.com nagsusumat nga mayda nagpapataya han Peryahan ng Bayan ha pira nga bungto ha Leyte. Naghimo hin research an Isumat.com kun mayda na ba otorisado nga grupo nga igbalik na an Peryahan denhi ha Leyte. Pero subay han surok ha PCSO, waray permiso ini nga Peryahan denhi ha Leyte, karuyagsidngon, iligal ngan supak ini ha balaud.
An National Government in nagdesisyon hanhadi nga himoon nga ligal an mga Numbers Game kay an natatabo hadto, hamurasak ini nga iligal nga pahuygo. Nakapaminsar an gobyerno nga nakakabulig ini han mga tawo nga nagpapataya kay naghahatag hin pakabuhi, pero iligal ini, ngan WARAY GANANSYA o BUHIS nga nahingangadto ha gobyerno ug an naghahakot han milyon-milyon nga kuhida amo an Gambling Lords.
Hinungdan hini, pira nga Numbers Game an ginhimo nga ligal basi waray magin problema an operasyon. Ini in makakabulig pa gud ha mga nagkikinahanglan sugad han mga magsakit kay an natitirok nga pondo in gin-aalutaga han PCSO para hini nga panuyu-anan.
Subay han mga importante han Isumat.com, mayda mga nagpapataya han Peryahan ha Abuyog, Carigara ngan pira nga bungto. Ira pa igin-asoy nga an pagbola han magdadaog nga numero in didto ha Abuyog.
An problema hini, an mga nagdudumara han ILIGAL PERYAHAN in posible nagboboot-boot la han madaog nga numero kay dapat iginpapakita ha media o publiko an pagbola hini. Nasering pa ngani an surok han impormasyon nga usahay an resulta han Swertres an ginkukuha nga kombinasyon, ngan ini in supak gihapon ha balaud.
Labot la hini, mayda na nakit-an nga Outlet o patayaan han Peryahan ha Carigara. Ini in iligal ngan harani pa gud han otorisado nga Lotto Outlet. Boot-sidngon, an mga ligal nga patayaan nga nahatag hin buhis ngan nakakabulig ha gobyerno in ginkokompetensyahan han ILIGAL nga PERYAHAN nga waray permiso tobtob yana nga mag-operate.
An surok han impormasyon in nagpakita pa hin mga litrato ngan ID Card han mga “Coordinator” nga nagsusudoy pagpataya. Hin-o daw la an naghatag ha ira hin katugutan? Kay-ano nga an “chaleco uniform” han coordinator waray nakabutang nga ngaran han kompaniya nga Operator?
Makikita ha uniporme an logo han PCSO. Ini aspeto in iligal na nga daan kay an opisina han PCSO in gingamit ha iligal nga pamaagi. Klaro ini nga Illegal Gambling. Mayda ba hini bendisyon tikang hit mga lokal nga opisyales ngan Philippine National Police.
Hi PNP Chief Director General Debold Sinas in ha deri pala maiha nagpagawas hin mahugot nga kamanduan nga “NO-TAKE POLICY.” Karuyagsidngon hini, an kapulisan in minamanduan nga deri kumarawat hin suhol o padalunot tikang han mga iligalista.
An Makalolooy hini an mga coordinator kay kun magkadadakop hira, mapepreso hira ug an piyansa porlomenos 60 Mil Pesos. Mapeperde gihapon an mga lehitimo nga Lotto Outlets Operators kay maiibanan an nataya ha ira ngan segi an ira remit han share han gobyerno. Apektado gihapon an pondo han PCSO nga ighahatag unta han mangangaro hin ayuda financial nga mga kablas.
An dako an ngisi ngan posible makalusot han kaso amo an Gambling Lord nga nagkokolekta han sinako-sako nga salapi tikang han iligal nga pahuygo.
Hi Presidente Rodrigo Duterte in nakadaog tungod han iya plataporma nga amo an pagdisiplina ngan pagsunod ha balaud han ngatanan. Unta angay naton ini pagsundon. Tumanon ini han mga mulopyo, mga negosyante, mga Gambling Operators labi na gud an mga opisyales han LGU ngan PNP. #
