Iginkalipay pagpasamwak han DOH-Region 8 nga ngatanan han samples dida han batch 8 nga ginpadara ha Cebu para han confirmatory testing in negatibo han corona virus. Ini nga batch in ginkokomponer han mga swab samples tikang hin walo nga mga Persons Under Investigation ha Sinirangan Bisayas.
Ini in subay han opisyal nga anunsyo han ahensya nga ginpagawas alas 5 han kulop, Abril 14, 2020.
Ini nga mga samples in tikang han mga pasyente nga naka-confine ha referral hospital nga amo an EVRMC, sugad man ha iba nga provincial ngan private hospitals.
Hapagkayana, ginpapamulat naman han DOH an resulta han 9th Batch kun diin mayda hini 26 nga swab samples. Ini an iginpadara para han testing ngadto ha Vicente Sotto Memorial Medical Center ha Cebu kakulop, Abril 13, 2020.
Nagpapadayon naman an panawagan han DOH ha publiko nga igpadayon an mga pitad nga ira ginhihimo basi makalikay han makamaratay nga kagaw.
Nagpapabilin nga upat ka tawo an nag positibo han corona virus ha Region 8, kun diin an duha in naka recover na ngan nakagawas na ha hospital, samtang an duha in gintatambal pa ngan aada ha maupay nga kahimtang an panlawas. #
(Posted 5:30 PM, April 14, 2020)
