Isumat.com/3:00PM, May 13, 2020
Magpapabilin pa kami ha ilarum han General Community Quarantine…..ini an hangyo han Maasin City, Southern Leyte ug an Eastern Samar.
Kakulop, an bug-os nga Eastern Visayas an igin deklarar han COVID-19 National Inter-Agency Task Force nga waray na kwarentina para han publiko tinikangan hiton Mayo 16, pero gintagan tobtob yana nga adlaw nga mag-apilar kun karuyag pa hin extension han lockdown.
Pira pala ka oras an nakalabay, hi Maasin City Mayor Nacional Mercado in nagpadangat hin surat ha Provincial IATF naghahangyo nga igpadayon an kwarentina ha ira syudad sugad man han bug-os nga probinsya han Southern Leyte tobtob hiton Mayo 31.
Dida han iya komunikasyon, gintagan hin duon ni Mercado nga an Maasin ug an Provincial Government in deri pa andam labi na gud an mga facilidadis para han mga magkaka-uli nga mga OFWs ug mga residente nga na-stranded han lockdown ha Manila ngan iba pa nga lugar.
Ginklaro pa ni Mercado nga nakaka-intindi hiya han karuyag han National Government nga maka-arangkada na utro an ekonomiya pero deri angay nga igbutang ha kadelikaduhan an mga kinabuhi han katawhan para hini nga panuyo.
Didto naman ha Eastern Samar, hi Gobernador Ben Evardone in magpapadangat hin komunikasyon ha National ngan Regional IATF para hin extension han kwarentina.
Sumala han impormasyon, magpo-proponer hi Evardone hin Modified General Community Quarantine para han lalawigan ngan tobtob ini hiton Hunyo 30.
Kanina han aga, an Provincial Task Force in nagkaada hin hiruhimangaw kasumpay han kahimtang han probinsya ug an mga pitad nga angay himoon ha masunod nga mga adlaw. Labot la han gobernador, presente gihapon dida han meeting hira Congresswoman Maria Fe Abunda, Vice-Governor Maricar Sison-Goteesan, mga Boardmembers ngan mga Mayors han magkalainlain nga mga bungto.
An Provincial Government in maghihimo pa han mga guidelines nga igpapasunod ha ilarum han Modified GCQ. # (KEVIN SIOSANA)
