Isumat.com/12:17PM, Enero 15, 2021
Waray na hunong an paghinataas han mga natatapnan han Covid-19 ha Eastern Visayas han nag-agi nga pira ka adlaw ngan dara hini, nagpasamwak an DOH-Regional Office nga makokonsiderar na nga aada ha kategorya nga Moderate ngadto ha High Risk an rehiyon.
Dida han pahayag ni DOH Regional Director Exuperia Sabalberino, ini nga pagbutang han mao nga kategorya han Region 8 in dara han padayon nga paghitaas han Covid Positivity Rate. Boot-sidngon, damo an nagpopositibo han mga ginjpapailarum hin swab test.
Kun papatamakan an nag-agi nga nga mga report han DOH han pira adlaw, nalapos ha 10 porsyento an Positivity Rate. Dida ngani han kanan Enero 14 ngan Enero 15 nga Covid Update, sumaka na ha porlomenos 13 porsyento an positivity rate.
Hinungdan hini, utro nanginyupo an DOH ha publiko nga tim-os pagsundon an pagsul-ot hin face mask ngan face shield,deri gumawas ha balay kun deri importante an rason, ngan deri maghimo o tumambong hin bisan ano nga klase hin katitirok.
Gin-aghat na gihapon han ahensya an mga hospital ngan mga Local Government Units nga dugangan pa an ira mga Isolation ngan Quarantine Units basi deri maghuroot an mga gintitimangno nga mga pasyente ngan Suspected Covid Cases.
Tobtob han Enero 15, umabot na ha 12, 635 an nagpositibo ha Eastern Visayas ngan 11,523 an naka-recover (91%). Mayda naman 154 an namatay nga natapnan han virus.
Tungod han epekto han Covid, nagdesisyon an Maasin City LGU nga temporaryo sadhan ha publiko an ira City Hall para han disinfection tungod han katapni hin empleyado.
An Eastern Samar Provincial Health Office in nagdeklarar gihapon nga natatabo yana an Community Transmission ha Borongan City tungod han paghitaas han kaso. An bungto han Guiuan in nagpapadayon an Hard Border Control dara gihapon han virus.
An SSS-Calbayog City in temporaryo gihapon ginsarado ha publiko sugad man an LTFRB Regional Office ha Pawing, Palo, Leyte.
Ha Tolosa, Leyte, igin-anunsyo ni Mayor Ofel Advincula nga temporaryo sarado gihapon an munsipyo tungod han epekto han pandemya. An Abuyog Town Proper nga ginkokomponer hin 9 nga barangay in aada ha Hard Lockdown tobtob Enero 18.
Suspendido gihapon hin duha ka semana an bulang ha San Miguel, Leyte katapos la magpositibo in usa nga lalaki nga nakigbulang hadton Enero 10.
Ha atubangan hini nga peligro, alagid-agid hin waray labot in damo nga katawhan kay denhi ha Tacloban ngan damo nga bungto nagpapadayon an pagkinalakat han mga menor de edad, abri an videoke ngan mga irignuman, abri an mga beach resorts nga damo an nagtatarampoog nga katawhan ngan padayon liwat an mga birthday parties.
Ha luyo nga bahin, nagpahayag naman an Information Officer han DOH nga naghabubo an kaso han dengue kun igtatanding han 2019.
Sumala han impormasyon, dida han 2020, mayda 4,944 nga insidente hin dengue. Ini in habubo hin 81# han mga kaso hadton 2019.
Ginlalauman naman han DOH nga magpapadayon ini nga pag-iban han Dengue Cases labi na kun magsunod han mga iginlatag nga pitad han ahensya an publiko ha paglikay hini nga sakit. #
