Isumat.com/7:29AM, Enero 25, 2021
Ginhahalpat ngan gin-iimbestigar yana han mga tinubyanan han balaud an grupo nga responsable pagsunog hin heavy equipment ha Mahaplag, Leyte hadin nakalabay nga adlaw.
Sumala han report han PNP Regional Office, alas 2 han maagahon han pagdagkutan ngan pagsunugon hin porlomenos 20 nga armado nga kalalakin-an an backhoe ngan bulldozer ha Sitio Agutayan, Brgy San Julian, Mahaplag.
An nasabi nga mga propyedad nga nagkakantidad hin 13 Milyones pesos in gintatag-iyahan han construction company nga Blue Sapphire, pahayag pa han report.
Tobtob han ginsusurat ini nga notisya, waray pa grupo nga nag-angkon nga hira an nagbuhat han krimen.
Hadin nag-agi nga mga panahon, pira na ka beses an parehas hini nga panhitabo kun diin nadadabi an CPP-NPA komo kaparte han ira extortion activities o pangikil ha mga contractor ngan negosyante. #
