Isumat.com/8:09AM, April 22, 2020
Nagpapadayon an mga pitad han LGU-Tarangnan, Samar ug an Department of Health basi deri na magtikadamo pa an matatapnan han corona virus didto hini nga bungto. Subay han impormasyon tikang ha Rural Health Unit han munsipalidad, ginkuhaan hin swab samples an ngatanan nga health workers han Tarangnan Community Hospital upod na gihapon an RHU.
An nasabi nga mga samples an igpapadara ha Cebu para han confirmatory test. Ginbuhat ini basi maseguro kun mayda pa ba iba nga tawo nga nakakuha han virus.
Kun aton manunumduman, tulo na ka tawo, ngatanan tikang han community hospital ha Tarangan an nag positibo han COVID-19. Dara hini an DOH in nagdeklarar nga nagkaada na hin local transmission han kagaw dida hini nga bungto.
Gintotoohan man gud nga an ikaduha nga COVID patient nga tikang ha Calbayog amo an nakatapon han ikatulo ngan ika-upat nga nag positibo kay magka-urusa man hira hin trabaho dida han hospital. An ika-unom nga positive case in nagtatrabaho gihapon dida hini nga hospital.
Kasumpay hini, an nasabi nga hospital an ginpasadhan ni Mayor Arnel Tan tinikangan yana nga adlaw ngan waray la anay bubuhaton nga panambal o check-up.
Dida han record han DOH, an naha-una nga duha nga positibo han virus ha Tarangnan in naka-recover na ngan nakagawas na ha hospital, pero an ika-unom nga tikang gihapon han mao nga bungto in gintatambal pa ha EVRMC.
Naka Total Lockdown yana an barangay nga gintikangan han ika-unom nga pasyente, samtang ginbulkas naman an lockdown ha mga barangay han naha-una nga nagpositibo pero natambal na. #
