Isumat.com/8:30AM, June 15, 2020
Karuyag ni Gobernador Mic Petilla nga igpabilin an pag-implementar han Modified General Community Quarantine (MGCQ) ha probinsya han Leyte paglapos han Hunyo 15, 2020.
Kun aton manunumduman, an Leyte ug iba pa nga probinsya ha Eastern Visayas ngan ha bug-os nga nasud an iginpa-ilarum ni Presidente Duterte ha MGCQ tikang hadton Mayo 15 ngan gin-extend ini tobtob Hunyo 15.
Yana nga adlaw (Hunyo 15) nakatalaan nga igpapagawas ni Duterte an iya bag-o nga desisyon kun bubulkason naba an MGCQ hini nga mga lugar o igpapadayon.
Nagsering hi Petilla, kun hiya la an masusunod, dapat MGCQ la gihapon an igpatuman ha Leyte labi na yana nga nagtitikadamo an natatapnan han COVID-19 dida han lalawigan. Tobtob han ginsusurat ini nga notisya, maabot na hin otsenta ka tawo an natapnan ha Leyte han kagaw.
Hi Petilla in deri kampante nga tatanggalon an MGCQ kay maduroy hin paghukal an ginpapasunod yana nga mga checkpoints ngan inspection labi na para han mga nagkaka-uli tikang ha iba nga lugar.
Naghangyo na an Provincial Government ha CEBU-IATF nga deri la anay igpadayon an pagpa-uli han mga na-stranded didto nga mga Leyteno basi matagan hin insakto nga pagtimangno an mga naha-una nga nakabalik nga aada yana ha Isolation Centers han probinsya.
Naglalaum an gobernador nga deri magkakaada hin local transmission han virus dida han probinsya tungod han istrikto nga kwarentina ngan swab testing han mga nagkaka-abot tikang ha iba nga lugar ug an mga tawo nga mayda sintomas han sakit.
Ha pagbanabana ni Petila maabot hin sobra dos mil nga mga Leyteno an na-stranded ha iba nga lugar nga karuyag na bumalik. # (KEVIN SIOSANA)
