Isumat.com/9:06AM, Abril 14, 2021
Waray angay ikabaraka hi Catbalogan City Councilor Alma Uy kay deri hiya target han militar para hin surveillance, sumala kan Maj Gen Pio Dinoso III, Commanding General han kanan Philippine Army 8th Infantry Division nga nakabase didto han mao nga syudad.
Ha interview han iFM-RMN Tacloban, gintagan hin duon ni Dinoso nga waray ginhihimo nga pagmanman o surveillance an militar kan Uy ngan waray rason an militar para igmonitor an mga gios han konsehala.
Kun manunumduman, pira pala ka adlaw an nakalabay, hi Uy in nagpahayag ha social media nga pira na ka adlaw nga mayda kalalakin-an nga nagliliyong-liyong harani han iya puy-anan sugad man opisina. Iya ini nabisto pinaagi han CCTV camera sugad man an pagsumat ha iya han iya mga security personnel.
Nagsering hi Dinoso nga an upat nga kalalakin-an in mga personales han Phil Army nga nagpapa-ilarum hin field training ha intelligence activities. An mga aktibidad han trainees in naglalakip hin paghimo hin mga pitad nga mayda nira kuntaloy praktis nga ginmamanmanan nga indibiduwal. Nag-esplikar an heneral nga natayming o iginkatuman la nga nahingadto an dereksyon han mga trainees harani han balay ni Uy.
Iginpatapod gihapon ni Dinoso nga andam hira maghatag hin proteksyon kan Uy kun pagkikinahanglanon ini. Dugang pa niya, naghatag na hiya hin kasayuran bahin hini kan Uy mismo.
Sering pa han opisyal nga an ira field training in may koordinasyon ha Catbalogan City Police.
Igindugang pa ni Dinoso nga ha tinood nga sitwasyon, imposible makabuksot o maka-abat in usa nga indibiduwal kun gintitiktikan hiya han mga miembro han Military Intelligence Battalion.
Hi Uy in kilalado nga kritiko ngan nagsusukna han mga gios han poderoso nga pamilya Tan ha Samar kun ha iya pagkita deri matadong an nasabi nga mga pitad han pamilya. #
