Isumat.com/1:54PM,May 15, 2020
Magpapagawas hin bag-o nga Executive Order hi Mayor Alfred Romualdez kasumpay han mga aludayday nga pagsusundon ha ilarum han Modified General Community Quarantine. Ini an iginpahayag ni Atty. Aldrin Quebec, an City Administrator, dida han programa nga “Durungganan” ha PRtv yana nga kulop.
Nagsering hi Quebec nga tobtob Mayo 31 an pagpatuman hini nga Modified GCQ. An Tacloban in usa han damo nga mga LGUs nga naghangyo ha National Inter-Agency Task Force nga igpabilin la anay an kwarentina. Kun manunumduman, bubulkason na unta an kwarentina ha bug-os nga Region 8 tinikangan buwas, Mayo 16. Pero dara han apilar han mga LGUs, nagdesisyon an National IATF nga magkaada hin modified GCQ hini nga mga lugar.
Samtang ginsusurat ini nga notisya, an Tacloban City COVID-19 Task Force in nagkaka-ada hin meeting basi ig-finalize an mga guidelines kasumpay han GCQ extension. Igpapagawas dayon ini ha publiko ha gilayon nga takna kun aprubado na ini han grupo ngan mapirmahan na ni Romualdez.
Gintagan hin duon ni Quebec nga harus parehas la gihapon an mga guidelines han naha-una nga Executive Order. Usa na denhi an deri pagtugot hin bisan hin-o nga tawo nga makasulod la hin basta-basta ha Tacloban. Magpapadayon an istrikto nga checkpoint ha borders, pahayag ni Quebec. Posible gihapon nga may mga pagbag-o hAn pira nga probisyon.
An mga pagbag-o nga posible matabo amo an pagtugot han mga PUV nga makasulod na ha syudad pero madepende kun may special permit tikang ha LTFRB.
Posible gihapon nga tugutan an kabataan makagawas ha balay basta mabisita la ha ira paryente, pero deri puede hira kumadto ha pampubliko nga lugar.
Posible gihapon nga tugutan an pag-angkas ha motorsiklo kun kaapi han sulod-balay o asawa an maangkas.
Tutugutan gihapon an pagkadto ha eskwelahan han mga estudyante ha kolehiyo kun mayda na guidelines tikang ha Commission on Higher Education (CHED).
An bag-o nga EO in igpapagawas ano man nga oras tikang yana.#(KEVIN SIOSANA)
