Igpapatuman anay an quarantine period para han mga tripulante han langyawanon nga barko antis ini makadu-ong ha Isabel, Leyte.
Ini an nagin pahayag han Philippine Coast Guard han Leyte ha paghatag hin kasayuran kasumpay han nasipatan nga cargo vessel harani han kabaybayunan han probinsya.
Nagsumat an Coast Guard nga an naka-rehistro ha Brazil nga cargo ship in nakatalaan nga mag diskarga hin mga materyales nga ginagamit han mining operations han nasabi nga bungto. Ini nga barko in may sakay nga 18 nga Pilipino ngan tulo nga Ukranians.
Hapagkayana, nagpahirayo la anay an nasabi nga barko ngan pumakadto han kadagatan nga nasasakupan han Bohol. Magpapabilin ini didto samtang naghuhulat nga matapos an kwarentina nga iginpahamtang para han mga tripulante.
Ini in kasumpay pa gihapon han mga pitad nga deri na magsarang pa an corona virus ha bisan diin nga parte han Pilipinas.
Namumutang ha Isabel an mga planta para han copper smelter and refinery ug dako an nabubulig hini nga industriya ngada han bungto. #
(Posted 8:20 AM, April 18, 2020)
