Isumat.com/Hulyo 25, 2022
Patay in usa nga anay Barangay kagawad han pusilon hiya samtang ginlalamayan an patay nga lawas han iya misis ha Brgy Julita, Biliran, Biliran hadton Hulyo 22, 2022.
Ha report han PNP, ginkilala an biktima nga hi Crispin Sumayan, 49 anyos residente ngan ex-konsehal han nasabi nga barangay.
Pasado alas 8 han aga hadto nga petsa, hi Sumayan in didto ha gawas han balay kun diin ginhahay-ad an patay nga lawas han iya kapikas ha kinabuhi nga tumalikod hin kadayunan tungod hin sakit. Dida hini nga takna, may umabot nga duha ka tawo nga sakay hin motorsiklo ug ginpusil hi Sumayan.
Kadagmitan gindara ha hospital an biktima pero gindeklarar nga dead on arrival han mga doktor. An mga suspetsado in padayon pa nga ginhahalpat han mga kapulisan katapos la nga mangalagiw kahuman mabuhat an krimen.
Hinsabutan nga hi Sumayan in naatubang hin kaso nga murder tungod han pagpataya kan Roberto Yapan, an kapitan han mao nga barangay hadton Hulyo 6, 2022.
Sumala han Biliran PNP, hi Sumayan in nahidabi dida han insidente tungod kay nasabtan ha ira imbestigasyon nga hi Sumayan an nagmaneho han motorsiklo nga ginsakyan han suspetsado pagpatay nga hi Jene Balce ngadto han panimalay ni Yapan, ngan hiya gihapon an nagmaneho han motorsiklo katapos han insidente.
Waray pahayag an kapulisan kun may koneksyon an pagpataya han ex-kagawad han naha-una nga pagpatay han kapitan del barangay. #
