Isumat.com/9:05AM, April 21, 2020
Ha pakig-usa han mga gi-os ha pagsurapo han COVID-19 pandemic, naghimo hin mga paagi an Eastern Visayas State University Anti-COVID Assist Project (EVSU-ACAP) kun diin damo nga mga grupo ug mga estudyante an nakatagamtam han ira ayuda.
Pira na ka semana an nag-agi han maghimo an EVSU han ExCITE Immuno Boster Drink nga igindistribuer ha mga frontliners ha panuyo nga mapakusog pa an resistensya. Ini nga masustansya nga irimnon in tikang ha carrots, moringa, buko juice ngan Lime. Sobra dos mil ka botelya an naipanhatag han unibersidad.
Naghimo gihapon an unibersidad hin ginalon-galon nga mga Surface Disinfectants ngan Hand Sanitizers.
Haros singko mil na gihapon nga face masks ngan face shields an nahimo han eskwelahan ngan ini an ipinanhatag ha mga personales ngan mga hugpo nga nangunguna ha pagsupil han corona virus.
Labot la hini, nakigsumpayan gihapon an EVSU ha mga LGUs ngan NGOs para han pag distribuer hin bugas, kape, bonay, mineral water, bangus, grocery packs, noodles ngan iba pa nga relief goods.
Waray gihapon pagpabay-i han unibersidad an ira mga estudyante nga na-stranded o napa-aw ha ira mga boarding houses. Damo man gud nga mga estudyante an waray maka-uli ha ira mga lugar dara han restrictive quarantine ha Tacloban.
Dara hini, an Students Affairs Office ngan University President Dominador Aguirre in nanhatag hin pagkaon ngan iba nga kinahanglan ngadto han apektado nga mga estudyante. Ira gihapon ginbuligan ini nga mga estudyante nga maka-uli ha ira mga bungto. An mga personales han eskwelahan in nag-aragmot para makahatag hin hinabang ngadto hini nga mga estudyante. #
