Isumat. com/4:05AM,July 20, 2020
Walo nga pasyente an naka-recover ngan may bag-o nga tulo ka tawo ha Eastern Visayas an nagpositibo han COVID-19. Ini an igin-anunsyo han DOH Regional Office kagab-i (Hulyo 19).
Aada na 639 aan nakatalwas tikang han virus ngan ini in 94% han 673 nga na-alakbatan han ginkakahadlukan nga kagaw denhi ha Region 8.
Iginpasamwak gihapon han ahensya han panlawas nga 31 nala an active cases han corona virus han rehiyon hapagkayana ngan nagpapabilin nga tulo an pasyente nga namatay.
An Tanauan, Leyte in may duha nga bag-o nga kaso. Hira in magtala-iroy nga umabot ngadto han bungto tikang ha Manila. An nanay in 46 anyos, samtang an anak in 17-anyos. Nagpahayag an LGU-Tanauan nga mag-upay an ira kahimtang ngan tikang han pag-abot didto na hira temporaryo nga nag-istar ha Municipal Quarantine Unit.
An ikatulo naman nga bag-o nga pasyente in tikang ha Leyte, Leyte. Hiya in 22 anyos nga lalaki nga nakabalik ngadto han munisipalidad tikang han iya ka-stranded ha Malabon City. #
