Isumat.com/4:09AM, August 25, 2020
May kadugangan nga 59 nga kaso han Covid-19 sanglit umabot na ha 2,248 an nagpositibo ha Eastern Visayas subay han gibabag-uhi nga report han DOH Regional Office nga iginpagawas han Agosto 24.
Nag-anunsyo gihapon an ahensya hin 33 nga bag-o nga recoveries sanglit aada na ha 1,381 an nakatalwas tikang han peligro han virus. Upod gihapon dida han report an duha nga binawi-an hin kinabuhi hinungdan nga 16 na nga Covid Patients haan rehiyon an namatay.
Hapagkayana, mayda 851 nga Active Cases nga gintitimangno han DOH ngan mga LGUs. Dida han mga nagkatatapnan, 250 ha ira an mga Health Workers.
An Catbalogan City an gidadamu-i an nagpositibo kakulop pinaagi han 18 nga pasyente nga natapnan. Sumala han LGU-Catbalogan, hira ngatanan in mga Closed Contacts han mga naha-una nga nadarahigan han kagaw. Umabot na ha 268 nga Catbaloganon an natapnan han virus upod na hira Mayor Dexter Uy ug an iya bugto nga hi Konsehal Stephanie Uy-Tan. Pira na ka adlaw an nakalabay, iginbalik ha Enhanced Community Quarantine an Catbalogan tikang ha Modified GCQ tungod han tigda nga paglobo han mga nagkatatapnan.
17 naman nga kaso an bag-o nga nahipatik ha Tacloban ngan ini in ginlalakipan hin duha nga Health Care Workers. Ha kabug-usan umabot na ha 211 an kaso ha Tacloban ngan kadam-an ha ira in natapnan pinaagi hin Local Transmission. Tikang ha MGCQ, utro nga gin-implementar an GCQ dida han syudad tinikangan kakulop nga adlaw.
Ha Pinabacdao, Samar, napulo an bag-o nga nagpositibo ug ngatanan hira mga Close Contacts hin mga naha-una nga natapnan. Mayda naman local resident ha San Jorge nga pumakadto ha Samar Provincial Hospital hadton Agosto 12 ngan kakulop nagpositibo hiya han kagaw. An Calbiga in mayda duha nga bag-o nga kaso ug usa naman ha Jiabong ngan hira in mga Close Contacts gihapon. An bag-o nga natapnan ha Calbayog City in usa nga LSI tikang ha Iloilo. Ha kabug-usan, an probinsya han Samar in mayda na 768 katawo nga natapnan, nasunod hira han Leyte nga mayda 804 nga kaso nga amo an gidadamu-i ha mga probinsya ha Region 8.
Dida gihapon han report kakulop, mga Local Cases an duha nga nagpositibo ha Babatngon; upat an natapnan ha Palo kun diin duha an Health Care Workers; usa naman nga Close Contact an bag-o nga kaso ha Tanauan: ngan ha San Miguel, usa nga Health Care Worker an nagpositibo.
Nadugangan hin usa nga kaso ha Eastern Samar. Hiya an asawa han pasyente han Covid nga taga Taft. Ha kabug-usan an Eastern Samar in nagkaada na hin 39 nga kaso han corona virus.
Aadi an mga numero han mga nagkatatapnan han kagaw han rehiyon: Leyte-804, Samar-768, Tacloban-211, Southern Leyte-201, Ormoc-100, Biliran-66, Northern Samar-59 ngan Eastern Samar-39. #
