Isumat.com/7:15AM, July 4, 2020
Katorse ka tawo an bag-o nga natapnan han COVID-19 ha Sinirangan Bisayas. Ini in subay han report han DOH Regional Office nga ginpagawas kakulop (Hulyo 3). Tungod hini, umabot na ha 577 an nagpositibo han virus ha aton rehiyon. Nagpapabilin naman nga 321 an naka-recover.
An syudad han Tacloban in nadugangan hin duha nga Positive Cases. Hira in mga Locally Stranded Individuals tikang ha Cebu ngan aadto ha Isolation Facility ngan maupay an kahimtang han panlawas. 56 na an natapnan ha Tacloban ngan 26 na an naka-recover.
An bungto han Palo in mayda tulo nga bag-o nga kaso. Duha an mga LSI tikang ha Paranaque ug an usa in OFW nga tikang ha Kuwait.
Mayda liwat bag-o nga kaso ha Tolosa, Leyte pinaagi hin 33 anyos nga LSI tikang ha Cebu. Didto naman ha Albuera, Leyte nahipatik an ira syahan nga kaso ngan ini in LSI tikang ha Cebu. Usa gihapon nga kaso an nahidugang ha Carigara. Hiya in 25 anyos nga babaye tikang ha Cebu.
An Villaba, Leyte in may bag-o nga pasyente nga LSI tikang ha Manila. Mayda gihapon duha nga bag-o nga kaso han corona virus an Bato, Leyte. Samtang nadugangan hin usa nga kaso an Leyte, Leyte ngan hiya in LSI tikang ha Quezon City.
Duha nga Positive Cases an nahidugang ha Bontoc, Southern Leyte. An usa in LSI tikang ha Cebu ug an usa empleyado han Rural Health Unit. Tungod hini, temporaryo nga waray operasyon an RHU-Bontoc kay naka-kwarentina an ngatanan nga ira trabahante. #
