Isumat.com/9:05AM,July 01,2020
Upat nga pasyente han COVID-19 an naka-recover kakulop (Hunyo 30) tikang han infection han kagaw. Dara hini, umabot na ha 222 an nakatalwas tikang hini nga sakit ha Rehiyon Otso. Ini in subay han gibabag-uhi nga impormasyon tikang ha DOH Regional Office.
Nagpapabilin naman nga tulo an tumalikod ha kadayunan tungod han virus.
Nadugangan naman hin walo nga bag-o nga Positive Cases, sanglit aada na ha 532 an natapnan han kagaw ha bug-os nga rehiyon. An mga bag-o nga kaso han Hunyo 30 amo ini: Alangalang, Leyte- 1; Dulag, Leyte-1; Burauen, Leyte-1; Palompon, Leyte-1; Capoocan, Leyte-1; Tolosa, Leyte-2; ngan San Jose, Northern Samar-1.
An taga Alangalang in usa nga personnel han Leyte Provincial Hospital. Nagsering an LGU nga harayo an posibilidad nga makatapon hiya ha ira bungto kay deri na hiya na-uli ha ira balay tikang han trabaho ha hospital. Samtang, an Dulag-LGU in waray pa maghatag hin impormasyon han ira bag-o nga kaso.
Usa gihapon nga health worker an nagpositibo ha Palompon, Leyte. Didto hiya nagtatrabaho ha bungto han Isabel ngan igbabalhin ha Isolation Facility ha Palompon. Ha luyo nga bahin, an duha nga taga Tolosa in mga LSI tikang ha Cebu.
Katapos hin pira ka semana nga nagin COVID-Free an Burauen, bumutho in bag-o nga natapnan ha ira bungto. Tikang ha Cavite ini nga indibiduwal nga umabot ngada han bungto hadton Hunyo 19 upod an iya misis pero negatibo an resulta han swab sample han misis. Usa gihapon nga LSI an taga Capoocan, Leyte ngan tikang hiya ha Cebu.
An didto naman ha San Jose, Northern Samar in tikang ha Caloocan nga babaye nga nakabalik ha ira bungto hadton Hunyo 18. Nagdudumara yana hin contact tracing an LGU kay mayda niya upod han iya pag-uli sakay hin pribado nga behikulo. # (KEVIN SIOSANA)
